അച്ഛൻ

അമ്മയെന്ന പ്രഭാവത്തിൽ
നിറം മങ്ങി ഉൾവലിഞ്ഞ്
അരങ്ങിലെത്താതെ പോയ
സ്നേഹത്തിന്‍ നിറകുടം

നിഴൽ

കൂട്ടിരുന്ന പകലിരവുകൾ
ഒന്നിച്ചു നടന്ന ഇടവഴികൾ
ഇരുട്ടുള്ളൊരു രാത്രിയിൽ
നീ മറഞ്ഞവഴിയേ ഞാനും..!!

അതിര്

കനപ്പിച്ച മുഖം
മുനയുള്ള വാക്ക്
അപരിചിത ഭാവം...
നിന്‍റെ മനസ്സിലും
അതിരുയർന്നുവോ.!!

രുചി

നീ ഭുജിച്ച അപ്പത്തിലും
നീയുറങ്ങിയ നിഴലിലും 

എന്‍റെ വിയർപ്പിന്‍റെ
ഉപ്പു മധുരം നുണയാം

 

പരിഹാസം

വാക്ക്
നോട്ടം, ചിരി
പുതിയ കാലത്തിന്‍റെ
വിഷം പുരട്ടിയ മുഖംമൂടി.!!

സ്വാതന്ത്ര്യം

എന്നിലേക്ക് നീ പകർന്ന
വെളിച്ചം ഒന്നണക്കാമോ?
ഇരുൾ കൊതിക്കുന്ന എന്നിലെ
എന്നെ നീ തിരികെ തന്നാലും..!!

പെണ്ണ്‍

പെണ്ണാവാനൊരുങ്ങി
പുടവചുറ്റി നിന്നിട്ടും
അവന്‍റെ വിലപേശലിൽ
ആട്ടിത്തുപ്പി ഓടിച്ചുവിട്ടു..!!

കറ

മനസ്സിലായിരുന്നു
ആദ്യം പറ്റിപ്പിടിച്ചത്
ശരീരത്തിലലിഞ്ഞ്
വ്രണമായി മാറി..!!

മഴ

നനുത്ത് കുളിരണിഞ്ഞു നീ
കാണാനൂലിൽ ഊർന്നിറങ്ങി
താളമേള ലാസ്യ മികവോടെ
തിമിർത്താടുന്നൊരു മോഹിനി

ചെരിപ്പ്

നീ എന്നോടൊപ്പം നടക്കുക

മുൾവഴികളും പൂപ്പാതകളും

ജീവിതത്തിന്‍റെ ഭാഗമെന്ന്

തിരിച്ചറിയുന്നിടം വരെ..!!

കടിഞ്ഞൂൽ

പ്രണയമായാലും
പ്രസവമായാലും
ആദ്യാനുഭവരുചി
മറക്കില്ലൊരുനാളും

ചതി

നീയെനിക്കേകിയ തണലിനും 
നീ പകർന്ന സ്നേഹത്തിനും
ഞാൻ കാണാതെ പോയൊരു
ഇരുട്ടിന്‍റെ മുഖമുണ്ടായിരുന്നു..!!

ആനയും ഉറുമ്പും

ഉറുമ്പിനെ കണ്ടപ്പോഴാണ്
നൂലിൽ തലകീഴായി
തൂങ്ങിയാടിയതിന്‍റെയും
അടച്ചിട്ട മുറിയിൽ
നൂണ്ടു കയറിയതിന്‍റെയും
രസം പറഞ്ഞതെന്ന്
വേദനയോടെ ആന

ഭടൻ

തുറന്ന അകക്കണ്ണ്
കരുതലുള്ള മനസ്സ്
ഉയിരുഴിഞ്ഞു വെച്ചവന്
പേരില്ലാത്തൊരു പേര്

കണ്ണീർപ്പുഴ

ഒരിക്കലൊഴുകിയിരുന്ന

തെളിനീരിന്‍റെ സാക്ഷ്യമാണ്

ഇന്നീ വരണ്ടു കാണുന്ന

വിണ്ടുകീറിയ

മുറിപ്പാടുകൾ..!!

ഭ്രൂണഹത്യ

നിലവിളികളായിരുന്നു

ചുറ്റിലും...!

വിശപ്പിന്‍റെ

അതിജീവനത്തിന്‍റെ..!!

എനിക്കു മുന്നിൽ

വരിയിൽ

പണമുള്ളൊരുത്തി

വയറൊഴിപ്പിക്കാൻ

കാശെറിയുന്നത് കണ്ട്

തിരിച്ചു പോന്നു..!!!

സന്ധ്യ

നരച്ച മുടിയിഴകളുടെ
നൈർമ്മല്ല്യം
ഇരുൾവീണ കൺതടങ്ങളിൽ
വിയർപ്പ്
ചർമ്മത്തിൽ ചുളിവുകളുടെ
കോറിവര
ഇതെന്‍റെ അസ്തമിക്കുന്ന
യൗവനം

അയിത്തം

ദാഹവും മൂത്രശങ്കയും..!
വൈദ്യരുടെ ശാസനയില്‍
ലഡുവും ജിലേബിയും
രസമുകുളങ്ങളിലെ കയ്പ്പ്.!!

പ്രായശ്ചിത്തം

തെരുവിലൊരു പെണ്ണുടലിന്‍റെ

പിടച്ചിൽ

പുലഭ്യം ആഘോഷമാക്കി

ജനക്കൂട്ടം

മാധ്യമ വ്യഭിചാരികളുടെ

ശേഷക്രിയ

ആൺപിറവിയായതിലെന്‍റെ

കണ്ണീർമഴ

ഗൃഹാതുരം

കോൺക്രീറ്റു കാടുകളിൽ
പെട്ടെന്നൊരു മഴ; കുളിര്...!
ഉരുകിയ ജോലിപ്പകലിൽ
മനസ്സ്; നനഞ്ഞു നാട്ടിലെത്തി..!!

പ്രണയചിത്രം

 
കൈവഴുതി വീണുടഞ്ഞ

പ്രണയകാലം

വക്കുപൊട്ടിയ വാക്കുകൾ

പാതി മുറിഞ്ഞ ചുംബനം

ചിതറിത്തെറിച്ച

അപൂർണ്ണ ചിത്രങ്ങൾ

അവ്യക്ത കാഴ്ച്ചകൾക്കിടയിലും

തിളങ്ങുന്ന നിൻ മുഖം..!!

(ഇടവഴിയില്‍ നഷ്ടമായ എന്‍റെ പാറുവിന്)

മിഴിനീർ

ഹൃദയത്തിലുറഞ്ഞുകൂടി
ചങ്കിനുള്ളിലൊന്നു തടഞ്ഞ്
കണ്ണുകളിൽ കിനിഞ്ഞുയർന്ന്
കവിളിലൂടെ ചാലിട്ടൊഴുകുന്നവൾ

അഭയം

കടം കയറി വിളർത്ത ജീവിതം
ആക്രോശങ്ങളുടെ പെരുമഴ
ഒടുവിൽ ഇരുളിനെ സ്നേഹിച്ചു
കാലിൽ ചങ്ങലക്കൊളുത്തിട്ടു..!!

മുറിവ്

 

പ്രണയവിരഹം

കൊണ്ടെന്‍റെ

ഹൃദയം തകർന്നത്

ശരിയാക്കാമോ

ഡോക്ടർ..?!

ശരിയാക്കാം,

പക്ഷെ വേദനിക്കും..!!

ഓഹ്,

അവളു തന്ന

വേദനയേക്കാൾ

വലുതല്ലല്ലോ..!!!

വാട്സ് അപ്പ് (പ്പം)

അടുക്കളയിലെ അവൾ
ഒരു കൈയ്യിലെ മൊബൈൽ
മറു കൈയ്യിലെ ചട്ടുകം
അടുപ്പിലെ കരിയുന്ന അപ്പം..!!