രുചി

നീ ഭുജിച്ച അപ്പത്തിലും
നീയുറങ്ങിയ നിഴലിലും 

എന്‍റെ വിയർപ്പിന്‍റെ
ഉപ്പു മധുരം നുണയാം

 

പരിഹാസം

വാക്ക്
നോട്ടം, ചിരി
പുതിയ കാലത്തിന്‍റെ
വിഷം പുരട്ടിയ മുഖംമൂടി.!!

സ്വാതന്ത്ര്യം

എന്നിലേക്ക് നീ പകർന്ന
വെളിച്ചം ഒന്നണക്കാമോ?
ഇരുൾ കൊതിക്കുന്ന എന്നിലെ
എന്നെ നീ തിരികെ തന്നാലും..!!

പെണ്ണ്‍

പെണ്ണാവാനൊരുങ്ങി
പുടവചുറ്റി നിന്നിട്ടും
അവന്‍റെ വിലപേശലിൽ
ആട്ടിത്തുപ്പി ഓടിച്ചുവിട്ടു..!!

കറ

മനസ്സിലായിരുന്നു
ആദ്യം പറ്റിപ്പിടിച്ചത്
ശരീരത്തിലലിഞ്ഞ്
വ്രണമായി മാറി..!!

മഴ

നനുത്ത് കുളിരണിഞ്ഞു നീ
കാണാനൂലിൽ ഊർന്നിറങ്ങി
താളമേള ലാസ്യ മികവോടെ
തിമിർത്താടുന്നൊരു മോഹിനി