പ്രവാസിയുടെ ഭാര്യ

കാലമിനിയും പോകും,
വസന്തങ്ങള്‍ വരും പോകും...

ഈ നിലാവെളിച്ചത്തിന്റെ
ചുവട്ടിലിരിക്കുമ്പോള്‍
നിന്നെക്കുറിച്ച്
ഓര്‍ക്കാതിരിക്കുന്നതെങ്ങിനെ...!!

നിന്റെ കണ്ണുകളില്‍
ഞാനെന്നെ കാണുന്നു..
നിന്റെ ഓരോ ശ്വാസത്തിലും
ഞാനെന്റെ പ്രാണനെ കേള്‍ക്കുന്നു...

ഇവിടെ,
മണല്‍കാറ്റിന്പോലും
നിന്റെ സുഗന്ധം...
തല പിളര്‍ക്കുന്ന ചൂടിലും
നിന്റെ ഓര്‍മ്മകള്‍
എനിക്ക് തണലേകുന്നു...

പതിരാമയക്കങ്ങളില്‍
നിന്റെ നിഴലുകള്‍
എനിക്ക് കൂട്ടിരിക്കുന്നു..
മയങ്ങാതെ, ഉറങ്ങാതെ,
ഒരായിരം പ്രാര്തനകളായി..

എന്റെ ചിന്തകളിലിപ്പോള്‍
നാടിന്റെ ഓര്‍മ്മകള്‍ ഉണരുന്നു..
വരാനിരിക്കുന്ന
ആ നല്ലദിനങ്ങള്‍
എന്റെ കയ്യെത്തുംദൂരത്ത്
എന്നെ മാടിവിളിക്കുന്നു..

പ്രിയസഖി,
ഉറങ്ങാതിരിക്കുക..,
മയങ്ങാതിരിക്കുക...,
നിന്റെ പടിവാതിലില്‍
മഞ്ഞുപെയ്യുന്ന ഒരുരാവില്‍
നീയെന്റെ വിളിക്കായ്
കാതോര്‍ത്തിരിക്കുക..

പ്രണയപുഷ്പങ്ങളുമായ്
നീയെന്നെ വരവേല്‍ക്കുക..

ഈ നിലാവുപെയ്യുന്ന രാവില്‍,
നിനക്കെന്‍റെ ശുഭരാത്രി നേരുന്നു....